Galw am ymddiswyddiad  Aelod o’r Bwrdd Addysg  -  08/02/08

Ymosodwyd yn chwyrn ar wrthwynebwyr cau ysgolion gan y Cyngh. Ieuan Jones (Annibynnol) yr wythnos hon, Yr Aelod o Fwrdd Gweithredol y Cyngor sy’n gyfrifol am Addysg a Gwasanaethau plant. Wrth siarad yng nghyfarfod llawn y Cyngor dywedodd y Cyngh. Jones, Llandeilo:

"Mae’n gywilyddus fod yna bobl mas fan’na sydd mor dwp, ac yn siarad rwtsh."

Ychwanegodd Arweinydd y Cyngor, y Cyngh. Meryl Gravell :

"Mae rhai aelodau (o’r Cyngor) yn dangos gwendid ac yn barod i wrando ar bobl mas fan’na."

Cododd y Cyngh. Eirwyn Williams, Plaid, gan ddweud ei fod yn falch o fod yn aelod oedd yn barod i wrando ar yr etholwyr. Wedi’r cyfarfod, dywedodd y Cyngh. Williams:

"Mae hyn yn mynd at graidd y ffordd y rheolwyd Sir Gaerfyrddin dros y bedair mlynedd ddiwethaf. Dyw democratiaeth yn cyfri dim. Agwedd 'Ni sydd yn gwybod orau' ydyw bob tro heb ddim parch at wahanol safbwyntiau. Dylai’r Cynghorydd Ieuan Jones o bawb, ac yntau’n gyfrifol am addysg, annog parch at wahanol farnau. Mae’n ddiwrnod trist os na fydd addysg yn dysgu ein plant i weld bob ochr i ddadl, a goddefgarwch a pharch tuag at y rhai sy’n anghytuno gyda nhw."

"Galwaf ar Ieuan Jones i ymddiheurio yn llawn i’r etholaeth yn gyffredinol ac i Ffred Ffransis gan iddo ei enwi, yn arbennig. Dyna’r lleiaf y dylai wneud."

Ychwanegodd Arweinydd y Blaid ar y Cyngor Sir, Peter Hughes Griffiths :

"Dro ar ôl tro methodd y Grwpiau Llafur ac Annibynnol ar y Cyngor a gwrando ar yr etholwyr. Caiff penderfyniadau eu gwneud gan nifer bach o unigolion ac uchel- swyddogion yr adrannau."